مصطفى بكري: "لما كيلو الطماطم يوصل 20 جنيه يبقى إحنا في أزمة حقيقة"

أكد الإعلامي مصطفى بكري أن الدولة المصرية تمر بظروف صعبة حاليا لافتا أن هناك حالة غلاء كبيرة تجتاح البلاد وتؤثر على المواطن نتيجة الظروف العالمية.

وقال بكري خلال برنامج "حقائق وأسرار" المذاع على قناة "صدى البلد": "لا أحد ينكر معاناة الناس ولا الظروف الصعبة التي يعانيها المجتمع المصري بدليل واحد بس لما كيلو الطماطم يوصل 20 جنيه؛ احنا في أزمة حقيقة ونحتاج لإعادة ترتيب البيت من الداخل".

وأضاف: "نحتاج لسياسة المصارحة والمكاشفة في كل شيء احنا عندنا رئيس بيسمع؛ خلينا نمتلك الجرأة دايما ونطرح كل الحقائق أمام رئيس الدولة الذي نثق في انتمائه".

وتابع: "كل المدافعين عن الدولة المصرية مفيهمش حد خاين ومفيهمش حد يتأمر لما نتكلم ونقول كلمة صريح لهذا الوطن وهذا النظام دي حاجة مهمة جدا خصوصا أننا شايفين مشاكل وأزمات تحيط بينا من الداخل والخارج تتطلب اصطفاف وطني حقيقي".

وواصل: "عايزين نشعر رجال الأعمال بالأمان بدل ما يهرب فلوس لبرة أو يقفل عايزين نلم البلد كلها خصوصا وأن العداء يتزايد الأن احنا شايفين قضية الخبير الاقتصادي أيمن هدهد لكن البعض بيحاول يصنع خالد سعيد جديد".

وأكمل: "احنا عايزين اصطفاف وطني عندنا تضخم وعندنا أسعار عالمية أثرت فينا؛ نعم الصناعة تأثرت بقوة نعم سعر الصرف ترك أثار سلبية على الناس عشان كدة اتعملت شهادة الـ 18% وعشان كدة اتعملت إجراءات الحماية الاجتماعية".

وأوضح: "في وزير مالية أفريقي بكى في الاجتماع الأخير لوزاء المالية وقال احنا داخلين على مجاعة؛ البلد بتتعرض لهجمة كبيرة ظروفنا صعبة من وقت كورونا وتوقف السياحة والحرب الأوكرانية؛ كنا بناخد مبالغ ضخمة من السياحة 60% روس وأوكرانيين وبنستورد 60% من زيت الطعام من أوكرانيا".

واختتم: "أنا مع الحد من المشروعات القومية حاليا واحنا في ظروف غلاء غير طبيعية نتيجة ظروف صعبة برة وارتباكات جوة وعشان كدة بنطالب دائما بضرورة أنه يكون في وضع جديد".