دعوات لمقاطعة كشري التحرير تتصدر تويتر.. تعرف على الحكاية

تصدر "هاشتاج" مقاطع كشري التحرير، موقع التدوينات العالمية "تويتر" في مصر، ونتناول القصة وكافة تفاصيلها.

بداية القصة

نشرت المواطنة سلفيا بطرس عبر صفحتها على "فيسبوك": "نزلت انهاردة جبت بنتي من الحضانة، كان عندها تمرين روحنا جري على هناك وباباها خلص شغله وعدى علينا، بعد ما خلصنا بنتي قالت: أنا جعانه، قولنا فرصه واحنا بره نعدي نأكل أي حاجه، وبما اننا صايمين ولقينا كشري التحرير -فاتح وشغالين قولنا نأكل ونروح".

أضافت "سلفيا": "قعدنا وطلبنا وجه الاكل، ويا دوب البنت بتأكل أول معلقه لقينا واحد من العاملين جاي يقول ممنوع الأكل قبل المغرب، قولت له يعني ايه ؟!!!، مش ده مطعم ومفتوح والناس قاعدة، قالي أه الناس تقعد بس محدش يأكل قبل الآذان، قولت له انت صايم ومستني الآذان براحتك أنا مش صايمة للمغرب وقاعده في مطعم، والأكل قدامي ازاي ماكلش، قالي هو ده النظام ولقينا واحد تاني جاي غالبًا مديره ويكرر نفس الكلام".

وتابعت: "احنا بقى مطلوب مننا نطلع معلقة الأكل من بق البنت ونقنعها أنها ماتاكلش في المطعم علشان فيه ناس قرروا يفرضوا ده على غيرهم، هل الصيام بالعافية حتى على المسيحيين؟".

دعوات لمقاطعة كشري التحرير

تصدر هاشتاج مقاطعة كشري التحرير تويتر، وعبر العديد من المغردون عن غضبهم من الواقعة، وقال "أحمد": "‏‎مقاطع كشري التحرير بلد عايش فيها مسلم ومسيحي ولا ديني مينفعش تعاملهم كلهم على إنهم مسلمين بالغصب والعند، اللي عايز يصوم هو حر واللي عايز يفطر لأي سبب ملكش دعوة ومش شغلك، انت شغلتك تعمل أكل وتبيعه وبس، فرض الوصاية على الناس اسمها جليطة وقلة أدب".

بينما قال "سامح": "مقاطع كشري التحرير لأن اللي حصل قله أدب وما فيش حرفية عندهم خالص، وبعدين دي طفله ووارد أنها تكون جعانة، وبكل صراحة أنا لي اصدقاء مسحين كثير يحافظوا دائما على عدم الأكل، واحنا صايمين وبيستنوا يفطروا معانا رغم إن ده مش واجب عليهم بصراحة !!!، خطأ من كشري التحرير ولابد من الاعتذار".

كشري التحرير يرد

نشر كشري التحرير، عبر صفحته على "فيسبوك"، توضيحًا للواقعة، وقالت: "العميلة المحترمة شرفتنا في فرع سراي القبة الساعة ٥:٥٠ م لطلب أوردر تيك أواي، ودفعت الحساب للكاشير واستلمت الأوردر تيك أواي"، مشيرة إلى أن التيك أواي غير مسموح بتناوله داخل الصالة.

وذكر: "العميلة لم تجلس داخل الصالة لأنها مغلقة في هذا الوقت، ولم يتم منع العميلة أو الطفلة، وإذا حدث غير ذلك فهو خطأ فرد وليس منظومة وسوف يتم معاقبة المخطئ على الخطأ المرتكب"، مضيفًا: "تم التواصل مع العميلة اليوم، وتوضيح سوء الفهم وتقبلت الاعتذار، ولا علاقة لهذا الأمر بكل الادعاءات التي تنشر عبر مواقع التواصل الاجتماعي".

وأكد كشرى التحرير: "نحن نكن كل الاحترام لكل العملاء، ولا يجوز التفرقة بين أي عميل فكلنا أخوة، ولا نعرف هذه النبرة الدخيلة علينا، ولم يعهدها أحد علينا طوال 60 عامًا"، مشددة كشرى التحرير مكان لكل مواطن.