ريهام سعيد: "عييت وشيلت مناخيري وجالي سكر ومحدش رفع سماعة التليفون"

أكدت الإعلامية ريهام سعيد؛ أن أزمتها مع معدة برنامجها سببت لها الذهول لفترة طويلة، موضحة أنها لم تكن تتوقع منها هذا التصرف.

وقالت سعيد في مقابلة مع برنامج "سابع سما" المذاع على قناة "القاهرة والناس": "المعدة كانوا بعتنها تسجلي أنا قعدت 6 أيام في حالة ذهول وكل اللي بسأله لنفسي ليه عملت فيها ايه؟".

وأضافت: "طاقم عمل البرنامج كان كله بيكره المعده دي؛ وكانوا بيقولولي متتعامليش معاها لكن أنا مش كدة؛ بيصعب علينا أن معقولة الناس دي مش بتحبني؟".

وتابعت: "كانوا بيجوا النهار ويحتفلوا بيا ويجيبولي هدايا؛ معقولة كل دة كان كدب؟ أنتوا قلتوا ملهاش قومة تاني ومش هترجع مذيعة تاني؛ واحدة اتسجنت هترجع مذيعة تاني؟ خلال مبقاش ليها عوزة".

وأكملت: "أنا عييت وشيلت مناخيري تلات مرات وجالي سكر وعملت حادثة بالعربية أنا وجوزي محدش رفع سماعة التليفون وسألني أنتي فين؟ هما اتنين بس اللي سألوا عني ومكانوش معانا في المشكلة".

وأوضحت: "بقيت باصة للناس أنهم وحشين أوي؛ أنا مش غلاطة أنا مؤدبة وباخد حقي بالقانون وببص على كل حاجة من غير شعف؛ أخدت قرار اعتزال الإعلام يمكن أريحهم".

واختتمت: "قعدت أقول طيب؛ كان عندي ساعتين إلا تلت إعلانات مبقاش عندي إعلانات؛ كنت بطلع تلات أيام في الأسبوع تلات ساعات بقيت أطلع ساعتين ساعة؛ كنت بتكلم في حاجات مهمة وبتاع بقيت أطلع أطفال؛ فالنجاح بيقل أكيد".