بعد فضيحة السنغال.. تامر أمين يطالب مصر بالانسحاب من الكاف
علق الإعلامي تامر أمين؛ على خسارة المنتخب الوطني أمام
نظيره السنغالي في التصفيات النهائية المؤهلة لكأس العالم بعد الهزيمة بركلات
الترجيح خلال مباراة الإياب التي أقيمت في السنغال.
وقال أمين خلال برنامج "أخر النهار" المذاع
على قناة "النهار": "دا عمي بسبب الليزر اللي متوجه في عنيهم ومحدش
يقولي أصل الليزر ملوش تأثير عشان دة كلام بقالين؛ هات صباع ليزر من الحديث؛ وفي
فرق بين اللي كنا بنلعب بيه واحنا صغيرين وبين مسدسات الليزر الموجودة دلوقت
والشعاع منها يدخل يخرم الحيطة".
وأضاف: "هات واحد وأضربه في عينك وأنت على بعد ألف
متر وأبقى قابلني لو عرفت تفتح عينك؛ واحد سنغالي مصور صاحبة وهو بيضرب الليزر؛
بتاعه معدن كبيرة مش البلاستك الصغير اللي احنا عارفينه".
وتابع: "محدش يقولي دة ملوش تأثير؛ دا يخل بمبدأ
تكافؤ الفرص؛ هما بيلعبوا ضربات الجزاء وهما مرتاحين واحنا بنقول يارب غمض وشوط
وتبقى دي الوسيلة للتأهل إلى كأس العالم بالإضافة لأن النظام أساسا غلط لما يتلعب
ماتشين ماتش ذهاب وإياب ألعب 30 دقيقة زيادة في أرض الخصم وضربات الجزاء في أرض
الخصم".
وواصل: "كدة في إنصاف والا هما متميزين؟ هما وخدين
فرصة أكبر؛ من هناك ورايح ماتش التأهل دة لازم يبقي ماتش واحد وفي أرض محايدة".
وأكمل: "اللي بيحصل عندنا دة أسمة هزار؛ وطول ما
أفريقيا الجماهير بتعمل شغب وبلطجة وتعتدي على اللاعبية وتستخدم ليزر والعقوبات في
الأخر 10 ألاف دولار وحرمان من الجمهور طول ما الكورة في أفريقيا هترجع للعصور
الحجرية".
وأوضح: "حصلت جريمة في الاستاد في نيجيريا كارثة
والنهاردة قالك ممثل الفيفا مات بسبب الشغب؛ لو مخدناش حقنا والقارة الأفريقية بقت
تطبق اللوائح والقوانين بجد عشان تتقدم أنا بقول أهو ياريت ننسحب من الاتحاد
الأفريقي دة ونروح الاتحاد الأسيوي".
واختتم: "ناس محترمة ولطيبفة واستادات جميلة وشعوب
راقية ونلعب بقي مع الاتحاد الأسيوي وتسيب الكرة الأفريقية للبهوات اللي بيديروها
على مزاجهم".
