أحمد موسى: تعرضنا لإرهاب في السنغال.. 50 ألف ليزر في المدرجات

أكد الإعلامي أحمد موسى؛ أن المنتخب المصري لكرة القدم تعرض إلى إرهاب خلال مواجهة السنغال في مباراة الإياب بالتصفيات النهائية المؤهلة لكأس العالم.

وقال موسى خلال برنامج "على مسؤوليتي" المذاع على قناة "صدى البلد": "لنا حقوق واللي عنده حق ما بيبسبوش؛ تتحرك مؤسسات الدولة بالشق القانوني؛ اللي حصل امبارح في السنغال من عنصرية ومن استخدام الليزر كل هذه الأمور لابد وأن تكون تحت سمع وبصر العالم".

وأضاف: "صحافة العالم بتتكلم النهاردة عن نجم مصر محمد صلاح من الأرجنتين لليابان؛ لاسبانيا لبريطانيا حديثهم رقم واحد محمد صلاح؛ جماهير السنغال كانت طبيعية؟ 50 ألف ليزر في المدرجات وكانوا بيوزعوه عليهم عشان يعملوا اللي يعملوه".

وتابع: "تعرضنا لإرهاب؛ منتخبنا تعرض للارهاب والجماهير المصرية تعرضت للارهاب؛؛ داحنا في استاد القاهرة أحسن استقبال مانيه بيتمشي في الاستاد والجماهير بتحييه ومنزلهم في فندق لو فتح الشباك هيلاقي ستاد القاهرة".

وأوضح: "إرهاب للجمهور واللاعيبة أنت متخيل 50 ألف بيرهبوا اللاعيبة ومحمد صلاح اتعرض للارهاب أمبارح وهو خارج وكسر الأسوار عشان يجري ويدخل ونحمد ربنا أنه محصلش كارثة".

وأكمل: "ثقتنا كبيرة جدا في الاتحاد الدولي لكرة القدم؛ جهة محايدة تحقق تماما فيما جرى تشوف الفيديوهات والليزر؛ محمد صلاح على عنيه وعلى وشه؛ دا ربنا ستر ومتعماش؛ الليزر على محمد صلاح مشافش الجول أصلا؛ وعلى زيزو اللي مبيضيعش".

وأوضح: "دا مبيحصلش في أي مكان في العالم ولكن حدث في السنغال؛ مكبرات الصوت مش ممنوعة؟ الليزر مش ممنوع؟ لاعبيتنا بينضربوا وبيتهانوا؛ صلاح خارج وسط حراسة أمنية مصرية ومكانش في تامين".

واختتم: "الحمد لله ربنا ستر على محمد صلاح وعلى لاعبيتنا وصحافة العالم مقلوبة على مصر وعلى محمد صلاح واللي اتعرضله المنتخب المصري".