تامر أمين يعلق عن مطالبات جماهير باريس سان جيرمان برحيل ميسي

علق الإعلامي تامر أمين؛ على مطالبات جماهير باريس سان جيرمان الفرنسي للنجم الأرجنتيني ليونيل ميسي بالرحيل عن الفريق.

وقال أمين خلال برنامج "أخر النهار" المذاع على قناة "النهار": "درس الحياة بتعلمهولنا؛ وكل شوية الواحد يكتشف أنه بيتعلم والدرس اللي اتعلمته هو أن سبحان الذي يغير ولا يتغير وأن أوعي حد يتغر بنفسه أو يحس أنه جامد ولا يمكن الاستغناء عنه لا دا كده في ثانية تلاقي نفسك مش موجود".

وأضاف: "الدرس من الأسطورة ميسى نجم منتخب الأرجنتين ونادي باريس وفي رأيي أنه أفضل من لمس كرة القدم في التاريخ ميسى أسطورة كرة القدم وكنا بنقول إنه من كوكب تاني تخيلوا أنه وصل بيه الحال أن جمهور باريس سان جيرمان بقاله يومين هتافه الوحيد في المدرجات هو ارحل يا ميسي".

وتابع: "عشنا وشفنا أن في جمهور كورة بيقول لميسي أن الخراب في الفرقة وصلنا ليوم اللي يتقال إن ميسي مبوظ الفريق وأنه أحد أسباب خروج الفريق من دوري أبطال أوروبا".

وأكمل: "أنا جه عليا اليوم اللي أسمع فيه أن ميسي عبء؛ أنا زعلان أن الكلام دة يتقال لميسي واللي بيحب الكورة ويتذوق الكورة لازم يعشق ميسي ولازم تزعل أن الأسطورة الكروية دي يتقال عليها الكلام دة لكن هي دي الحياة".

واختتم: "الناس اللي قالتلك أن ميسي يوم ما يكح الأندية تتهافت عليه جه اليوم اللي ميسي بيتقاله أرحل وقال لوكيل أعماله أنه عايز يرحل وأنه مش عايز يكمل في باريس لأن الجمهور مش قابلني والدرس هنا أوعى تفتكر أنها دايمة ليك".