إلهام شاهين: الهجوم على "بطلوع الروح" شهادة نجاح للمسلسل

علقت الفنانة إلهام شاهين؛ على الهجوم الذي تعرضت إليه على خلفية دورها في مسلسل "بطلوع الروح" والذي تؤدي خلاله دور إحدى السيدات المنتميات إلى تنظيم داعش الإرهابي.

وقالت شاهين في مداخلة هاتفية لبرنامج "صالة التحرير" المذاع على قناة "ًصدى البلد": "الهجوم نجاح للمسلسل مقدما وهو تسبب في دعاية كبيرة والناس كلها منتظرة المسلسل".

وأضافت: "أنا مش فارق معايا مسألة الهجوم؛ أنا مش عارفة بيهاجموني على إيه؟ الكلام اللي بيكتبوه كلام يضحك؛ وأنا بقوم بدور إرهابية ودة لبس المجاهدات في داعش مش مجرد واحدة محجبة وخلاص وبتتزعم وليها شخصية قوية وبتجند الداعشيات الجدد".

وتابعت: "أنا مش عارفة بيهاجموني على إيه؛ هل الناس اللي بتهاجم دي مع داعش مش عايزانا نظهر مساوئ هذه التنظيمات؛ هل في حد عاقل في صف الإرهاب وبيدافع عن الحاجات دي؟ هما موجودين وأنا بوعد الناس بمسلسل محترم وهو بيناقش بهدوء".

وأكملت: "معايا مخرجة جبارة هي الأستاذة كاملة أبو ذكري وكاتب جميل وهو الأستاذ محمد هشام عبيد ومجموعة رائعة من الفنانين عاملين أدوار عظيمة ومعانا ممثلين من كل الوطن العربي ومعانا أجانب كمان معانا أوكرانية وروسية وبولندية".

وواصلت: "كل اللي أفكارهم متطرفة هيكونوا مدايقين مع أني بمثلهم والشخصية مش بتهاجمهم؛ ولكن هما مش عايزين يتفضحوا لأن لما يشوفوا نفسهم على الشاشة هيكون فضح ليهم ولأفكارهم الظلامية".

واختتمت: "هما في حالة رعب من الفن وقد كدة الفن مؤثر وله دور عظيم في تشكيل وجدان الناس وأنا عارفة أن لو أي واحدة غيري بتقوم بالدور مكانش هيبقي في الهجوم دة".