«عرفوا يشحنوك ضدى».. أول تعليق من أحمد فلوكس على تصريحات والده
رد الفنان أحمد فلوكس على تصريح والده فاروق فلوكس بأن ابنه أصبح يتجاهله ولا يتواصل معه.
ونشر أحمد فلوكس مكالمة بينه وبين والده عبر حسابه بموقع التواصل الاجتماعي "إنستجرام" قال فيها والده: "أنا مش كويس ولما بطلع أتكلم في البرامج بقول كلام كتير لأن أنا قلبي طيب والله".
ورد أحمد فلوكس على والده قائلًا: "هما مستوعبوش كلامك، عايزين يطلعوني مجنون فتمام، أنا عارف اللعبة اللي دي اللي بيعملوها، وهما مش هيفهموا، لما يكون عندي مشكلة مش هاجي أقولك أنا بمر بظرف كذا، لأن المفروض مقولكش مشاكلي، وهما عرفوا يشحنوك وياخدوا كلام معين منك، بناء على سنك أنك كبرت".
ليوجه له والده فاروق فلوكس رسالة اعتذار، قائلًا: "أرجوك متزعلش مني، ليرد عليه نجله أحمد: جزمتك فوق راسي، متشيلش جواك، دي لعبة ملكش ذنب فيها، أنت عارف إني بحبك جدًا، ومقصرتش معاك، ولو مجتش البيت عندك لظروف معينة أنت عارفها كويس، وأنا مش هطلع أشرح، وأتكلم في بيتي وحياتي الشخصية".
كشف الفنان فاروق فلوكس، عن أنه متوقف عن العمل بالتمثيل منذ خمسة أعوام ويمكث في المنزل.
وأضاف في لقاء خلال برنامج " كلمة أخيرة" الذى تقدمه الإعلامية لميس الحديدي على شاشة ON: أنا راجل قدري، وأؤمن بقدر الله، ولو لقيت دلوقتي دور مناسب ليا هعمله، موضحا أن الجيل القديم ممكن يفيد الجيل الجديد قائلاً: رغم أنى قاعد بقالي خمس سنوات في البيت بس زعلان وأنا مش غني وعايش على معاشي بتاع الهندسة ومن غيره كنت هبقى لايص وعايش بحب الناس وتقديرهم لي.
وتابع فاروق فلوكس: أنا مش بقول كده نوع من الشكوى، فالفنان الكبير حمزة الشيمي قبل وفاته قال لي إحنا بقينا خردة وتكريمي كان لجيلي كله، فأنا اشتغلت مع كبار الناس ومنهم الريحاني والمهندس والست عقيلة راتب.
وأوضح أن بعض فناني الجيل الجديد يرفضون الجيل القديم ولابد من إفادة العصر القديم للحديث، قائلاً: ليه الفنان أسامة عباس ميتكرمش! ممكن مش عاوز يشتغل دلوقتي بس على الأقل يتكرم، ومفيش شغل بيجيني وأنا بكتب وألف وأترجم لكن في الفترة الأخيرة نظري لم يسعفني، موجها رسالته للفنان أشرف عبد الباقي، قائلاً : "أناشد الفنان أشرف عبدالباقى يعمل مسرحية كتبتها اسمها "عيد ميلاد فؤاد" عن الفنان الراحل فؤاد المهندس".
