والد الفنانة بوسي يكشف تفاصيل الخلاف مع ابنته

أكد محمد شعبان؛ والد المطربة بوسي؛ أن ابنته لازالت لا تتواصل معه رغم ظروف الصحية والمادية الصعبة على عكس ما ادعته في وقت سابق.

وقال شعبان في مداخلة هاتفية مع برنامج "خط أحمر" المذاع على قناة "الحدث اليوم": "أصحابي عملولي فيسبوك مرتين والناس قالتلي أن هي طلعت ونكرت الكلام دة وأنا مفيش في أيدي حاجة تعملها هي عايزة تسيب أبوها كدة تعبان وولادتي التانيين زعلوا مني أني عملت الكلام دة وقلتلهم أنا تعبان وأنتوا مبتسألوش".

وأضاف: "أنا عندي أربع بنات متجوزين والأربعة كل واحدة فيهم معاها عيالها وبيقولوا أنا أخدمك والا أخدم عيالي ومحدش بيزورني وأنا كل أسبوع بروحلهم مش هما اللي بيجولي بعدي عليهم وأقعد معاهم وأمشي لغرض أني أشوفهم بس".

وتابع: "والله والله بوسي من 5 سنوات مببعتليش حاجة؛ عشان الحلفان بس كنت اتكلمت مع قناة الحياة وتاني يوم بعتتلي ألفين جنيه".

وأكمل: "أخواتها الرجالة واحد منها كان شغال معاها وطردته؛ وشغال سواق هيديني أيه؟ والتاني أنا مبشفوش بقالي 20 سنة ومعندوش شغلة وأهل أمه بيصرفوا عليه ولو شافني أكن مخبر بيجري وراه وعمره ما سلم عليا وقالي ازيك يابا والا أي حاجة".

واختتم: "هي ربنا يسهلها ويزيدها باللي هي فيه وربنا لما بيكره واحد بيزيده باللي هو فيه وربنا بيقول وبالوالدين احسانا وهي مبتسمعش كلام ربنا هي براحتها".