تامر أمين عن فيلم "أصحاب ولا أعز": "أفكار شمال وشاذة"

أكد الإعلامي تامر أمين؛ أنه يرفض تماما فيلم "أصحاب والا أعز" لافتا أنه يجب على الجميع رفض الفكرة التي يقوم عليها الفيلم والمتعارضة مع الدين والقيم والأخلاق.

وقال أمين خلال برنامج "أخر النهار" المذاع على قناة "النهار": "حواري امبارح مع ضيفي في البرنامج الناقد الفني الأستاذ طارق الشناوي؛ ناس كتير أوي تواصلوا معايا خصوصا أن الحوار كان مناظرة بيني وبينه عن موضوع فيلم أصحاب والا أعز وفي ناس هناك قالت مين انتصر ومين لا؛ وأنا مش ميال للفكرة دي لكن أنا ميال لفكرة الأفكار اتناقشت صح؟".

وأضاف: "أنا ضد الفيلم؛ ومش ضد الفيلم كحرية أبداع ولكن أنا بطالب برفض الفيلم؛ رفض الفيلم يعني الناس تقول أنا رافض الفيلم ورسالة الفيلم ورافض الأفكار الشمال والأفكار الشاذة والحاجات اللي تتعارض مع الدين ولو كره الكارهون؛ محدش يقولي الدين برة الفن".

وتابع: "أول كلمة يقولهالي بعض الناس في المعسكر الفني يقولك طلع الدين برة؛ هو في حد يقدر يطلع الدين برة؟ الدين هو أساس الحياة وهذه الحياة اتعملت عشان الدين؛ أنا معنديش أن الفن حرام ولا تحريم الابداع ولكن واحدة واحدة في حاجة اسمها دين وأخلاق وقيم ومفيش حاجة خلقها ربنا يجب أنها تتعارض معاهم".

وأكمل: "الحرية مضبوطة بالدين والأخلاق؛ تعرفوا تطلعوا الدين برة حياتكوا لأي حد بيقول الجملة دي؛ لما تتحاسب هتقول لربنا حاسبني على كل حاجة بس طلع أعمالي الفنية وأنا ضد بردو الناس اللي بيخنقونا بالدين؛ الدين يسر وإبداع وفن؛ المسلمون أستقبلوا الرسول في المدينة بأغنية ولم ينكر عليهم ذلك".

واختتم: "رحم الله الشيخ محمد متولي الشعراوي قعدت معاه وقالي كل شيء في الدنيا حلاله حلال وحرامه حرام؛ حسنها حسن وقبيحها قبيح؛ مفيش حاجة برمتها حلال ولا حاجة برمتها حرام؛ بالمناسبة عشان تعرفوا أن ربنا كريم ودينا الإسلامي دين يسر مساحة الحرام قليلة جدا قصاد مساحة الحلال تقوموا سايبين كل الحلال دة وتمسكوا في المتر الحرام؟".