"أول امبارح".. شريف عامر يروي تفاصيل آخر مكالمة مع الراحل ياسر رزق
كشف الإعلامي شريف عامر؛ تفاصيل المكالمة
الأخيرة التي أجراها مع الكاتب الصحفي ياسر رزق رئيس مجلس إدارة مؤسسة أخبار اليوم
السابق والذي توفي بعد معاناة مع المرض.
وقال عامر خلال برنامج "يحدث في مصر"
المذاع على قناة "أم بي سي مصر": "أول أمبارح كان في تليفون مع
ياسر رزق؛ أولا أنت ممكن تكون قريت أو شفت ياسر رزق في حوار ولكن ياسر رزق راجل
نبيل هو من الناس اللي قدروا يكسبوا احترام وود الأجيال اللي بعده والأكبر منه".
وأضاف: "في يوم من الأيام الأستاذ هيكل
قالي أنا مش عارف بحبك أن وياسر رزق ليه؛ كان محتفظ بحب وود الأجيال اللي سبقته
واللي بعده؛ هو نشيط وموهوب وصحفي معتبر وعلى المستوى الإنساني شخص نبيل
جدا".
وتابع: "أول أمبارح كنت بتكلم مع ياسر؛
احنا تليفوناتنا مبتتقطعش وبينا خط موصول؛ كنا بنتكلم ونتفق أنه هيكون موجود معانا
يوم 25 يناير اللي هو أمبارح عشان نتكلم عن أحداث يناير وبعدين كلمني وقالي مش
هينفع أبقى موجود وعندي فحوص طبية داخل أعملها على المستويين كان عنده مواجهات
شديدة مع المرض على مستوى القلب أو الأورام".
وواصل: "كان عنده فحوص طبية على مستوى
القلب وجلسات علاجية على مستوى الأورام وقالي أدعيلي أنا مش عايز أعمل قلب مفتوح
وكأن القدر اختارله أنه يرحل في لحظة من غير ما حد يلمسه".
واختتم: "عبد الرحمن الأبنودي قال اللي
بيتخطفوا بيعيشوا في القلب على طول؛ ياسر رزق عاش في قلوب ناس سبقته وناس جات بعده
وهيعيش في القلب على طول بعد رحيله من خلال كتاباته والكتاب الأخير اللي كان سعيد
بيه واللي كلنا كنا سعداء بيه وكان في جزء تاني مش عارفين هو خلصه والا لسة مكانش
اشتغل عليه".
