عمرو أديب يحذر من تفشي أوميكرون في المؤسسات: "مش هنلاقي حد يخدمنا"

علق الإعلامي عمرو أديب؛ على زيادة الإصابات مؤخرا بين المصريين بمتحور أوميكرون، لافتا إلى أن هناك علم عام بارتفاع معدلات الإصابة.

وقال أديب خلال برنامج "الحكاية" المذاع على قناة "أم بي سي مصر": "حواليكم شايفين وسامعين الناس اللي بيجيلها أوميكرون ونعلم أن في ناس كتير عندها كورونا وبتنزل الشغل لأن عدد العمالة اللي موجودة غير كافي".

وأضاف: "ليس عندي أرقام ولكن هناك علم عام أيوة أغلب اللي جنبي عندهم؛ كل ما بتسيب الناس تنزل الشغل الأعداد بتزيد أكتر أخشى ما أخشاه أن يحصل عندنا مشكلة في المصالح الصحية والمستشفيات والأماكن المسؤولة عن العلاج".

وتابع: "نريد حل ما أنا معرفش أية هو وأنا لا أنادي بالإغلاق قلتها ثلاث؛ أنا بقول لأولى الأمر أكيد في حل؛ يعني دلوقت جاي عيد الشرطة معاه 25 يناير معاه خميس وجمعة نهدي الدنيا كدة لحد ما الناس تخف وترجع شغلها تاني".

وواصل: "الموضوع قدامنا الأعراض ليست كبيرة والعلاج في البيت قليل؛ الناس ممكن تتعالج وترجع بسرعة؛ برة قرروا أن المدرسين ترجع بعد 5 أيام من غير بي سي أر أو أي حاجة؛ أنا لست متخصصا ولكن بقول إننا لا نريد الإغلاق ولكن نريد بعض المصانع وبعض الأماكن الاختلاط فيها يقل".

وأردف: "يعني مثلا وزارة من الوزارات اللي فيها المبنى فيه 6 آلاف بني آدم ومبنى ماسبيرو اللي فيه 25 ألف بني آدم دا ممكن يجرى إيه فيه مع أوميكرون؟ العيب مش فيهم العيب في الوباء؛ يا جماعة عشان نلقى حد يساعد حد؛ نلقى ناس شغالة في المصالح الحكومية أو مرافق المياه أو الكهرباء الموظف اللي يتعب مش هينزل أو ينزل يخلص على المؤسسة كلها".

وأكمل: "أنا بقول لأولى الأمر اللي هما العلماء ووزارة الصحة ومسؤولين لجنة الأزمة أن يروا حلا احنا محتاجين البلد تهدي 5 أو 6 أيام ميبقاش في مدارس مكربسة أو مصالح حكومية مكربسة أنا لا أدعو لإغلاق الحياة الاقتصادية احنا نقدر نشيل بعض ونتصرف".

واختتم: "لو سمحتم شوفولنا حل لأن ابتدت ناس كتير عندها شركات كبيرة تصرخ وتصوت؛ أنا معنديش عمالة أنا النهاردة القسم المالي مجاش قسم الاتش أر مجاش؛ ومدارس بقيت تسأل عن المدرس يقولك عندي كورونا".