«اللي بيصور تافه».. إلهام شاهين ترد على صلاتها دون حجاب في جنازة مها أبوعوف
ردت الفنانة إلهام شاهين على ظهورها دون حجاب أثناء صلاة جنازة مها أبوعوف، وتعرضها لانتقادات حادة من رواد مواقع التواصل الاجتماعي.
وقالت «شاهين»، خلال مداخلة هاتفية ببرنامج «كلام الناس» المذاع عبر فضائية «إم بي سي مصر»: «الفنانة الراحلة مها أبوعوف تعتبر زميلة عزيزة ولينا مع بعض عشرة وذكريات».
وأضافت: «أنا مش بتابع السوشيال ميديا خالص الحقيقة ولو فيه حاجة عليا حد بيحكيلي، والجمهور ملوش دعوة بمين حضر ومين محضرش، ودي حاجة متخصهومش».
وتابعت: «مفيش جنازة إلا أما بيبقى كم من الفنانين فظيع موجود، وامبارح كان فيه ناس موجودة معرفناش بعض من كتر ما هم كتير، ودنيا سمير غانم كانت موجودة وانا ماخدتش بالي إلا من خلال الصور، واحنا مش رايحين نتصور».
وأشارت: «كنت لابسة حجاب ولكن الطرحة وقعت وكانت متدلدلة على كتفي، واتزحلقت ومأخدتش بالي للحظة وبعد كدا لبستها، واللي واقف بيصور الناس وهي بتصلي دا تافه».
كانت الفنانة إلهام شاهين قد تعرضت لهجوم حاد من رواد مواقع التواصل الاجتماعي بعد ظهورها في صلاة جنازة الفنانة الراحلة مها أبوعوف دون غطاء للرأس.
