شيكابالا وأحمد الطيب يشاركان في خناقة «ميدو وكوكا» على تويتر

دارت مشادة كلامية حادة بين أحمد حسام ميدو، نجم الكرة المصرية ومدرب نادي الزمالك سابقًا، وأحمد حسن كوكا، لاعب منتخبنا الوطني المحترف، ومهاجم قونيا سبور التركي، وذلك بعدما انتقد ميدو أداء كوكا عبر حسابه الشخصي على موقع التواصل الاجتماعي تويتر.

وغرد ميدو عبر حسابه على تويتر: "مهاجم متواضع لا يصلح للمستوى الدولي حتى ولو أحرز 1000 هدف"، ردًا على إشادة أحد رواد موقع التواصل الاجتماعي ليتدخل كوكا فورًا للرد على ميدو.

ورد كوكا على ميدو: "مهاجم متواضع؟ أولا هو أنت أصلا مين طلب رأيك؟ ثانيا أنت مبطل كورة وأنت عندك 29 سنة وكل الناس عارفة ليه، ثالثا لو رقم الأهداف اللي أنا جايبه شايفه قليل ماجبتوش أنت ليه؟ مع أن اللي بيلعب في نادي أكبر فرصه بتكون أكتر في التسجيل".

تفاصيل خناقة ميدو وكوكا على تويتر

وتابع: "رابعا حاولت تبقي مدرب ومبتكملش شهر في أي ناد، خامسا بتحاول تبقي إعلامي وتتكلم عن ده وده عشان تبقي تريند بأي شكل، أي حاجة عايز تدخل فيها، ده حتى صلاح في أول مشواره كنت بتتكلم عليه وحش، الحقد عالي أوي عندك من زمان وأنت بتتكلم وحش عني".

وأضاف: "أنا عارف أن أكبر غلط اني أرد عليك وأنت فاضي وعندك برنامج تتكلم فيه كل يوم، بس أنا برده مش هيهدني كلامك وهفضل في طريقي، مركز في مستقبلي ومش عايز حاجه من الناس بعد مبطل كوره وبعد لما أموت غير السيرة الحلوة".

وعاد أحمد حسام ميدو ليرد على كوكا، مغردًا: "عمري ما روحت المنتخب عشان مناسب حد مهم، أنت عارف كويس أنت بتروح المنتخب ليه، رد في الملعب حاول تروح المنتخب ليه .. رد في الملعب وحاول تروح الملعب، أنت لاعب تعبان وكل مؤهلاتك نسبك وأنت عارف ده كويس".

وأتم: "وأنا عمري ما لعبت في دويات الألاضيش اللي أنت بتلعب فيها، مصر كلها بتقول عليك لاعب على ما تفرج، مش أنا بس، وتاني أنت عارف كويس وأنت كنت بتروح المنتخب ليه .. أجيب سيرة حلوة إزاي وأنت ما بتعرفش تلعب، مفيش حد هيجيب سيرتك لا بالحلو ولا بالوحش".

شيكابالا وأحمد طيب ومحمد هاني يتدخلون في خنافة ميدو وكوكا

من جانبه، دعم الثنائي محمود عبدالمنعم شيكابالا، قائد الزمالك، ومحمد هاني، لاعب الأهلي، أحمد حسن كوكا بنشر صورة مع اللاعب والتعليق عليها بـ "قلب".

بينما وجه أحمد طيب رسالة إلى ميدو بشأن خناقته مع كوكا، عبر حسابه على موقع التواصل الاجتماع "فيس بوك": "انا زعلان من ( ميدو ) جداً - لإنه هو نفسه مش عارف قدره و عظمة التاريخ الجميل اللى صنعه و رصيد الحب اللى له ليس فى مصر فقط ولكن فى الوطن العربي - و اد ايه هو قدوة و رمز لكتير من اللاعبين فى مصر وخارجها — علشان كده ما ينفعش ينتقد لاعب ( كوكا ) بهذا الشكل و الأسلوب مهما كانت الأسباب - خسارة يا ميدو تخسر حب و اقتناع ناس بتحبك و انت بالنسبة لهم قدوة و رمز جميل — ولو لك تحفّظ او وجهة نظر يبقى ممكن تكلمه تليفونيّاً او تتواصل معاه و تقوله اللى عايز تقوله - انت قيمة كبيرة بنسعد بيها خسارة تخسر حب انت تعبت فى انك توجده — ( كوكا ) اخ اصغر لك. و ( نحت ) فى الصخر و يحتاج لمن يشجعه و يشكره و يدفعه للأمام كمان و كمان دلوقتى تقدر تكلمه و تقوله وجهة نظرك و كلنا قبل كوكا ها يزداد حبنا و تقديرنا ليك".