أحمد موسى عن بيان الخارجية الألمانية: "عيب وعار.. ما تيجي أنت تحكم؟"

علق الإعلامي أحمد موسى؛ على بيان وزارة الخارجية الألمانية بشأن المحاكمة القضائية لعدد من المتهمين في بعض القضايا والمقرر أن يصدر فيها حكما خلال الأيام المقبلة.

وقال موسى خلال برنامج "على مسؤوليتي" المذاع على قناة "صدى البلد": "الجماعة أصدقائنا الألمان يقولك احترم القوانين ويرجعوا دلوقت يقولوا متحترمش القوانين واعمل اللي أنا عايزه؛ لا ياحبيبي أنت مالك بتدخل في الشأن المصري مين ادالك الحق هو أنا بتدخل في شأن ألمانيا أو هولندا؛ أنت مالك بالقضاء المصري وناس متهمين بقضايا إرهاب".

وأضاف: "الخارجية الألمانية بتحاول تدي دروس؛ واحنا مبنخدش دروس من حد انتوار ميتوا اللاجيئن على الحدود في درجة حرارة 10 تحت الصفر وبتكلمونا على حقوق الإنسان".

وتابع: "كلام الخارجية الألمانية عيب وعار؛ أنا عندي قضاء قبل بلدك وقبل أي حد وبنحقق المحاكمة العادلة المحامي موجود في التحقيقات وخلال المحاكمة وبنعمل القانون مش عشان حد ومبنحاكمش الباقر على أنه محامي ولكن قضية إرهاب؛ اللي بيرتكب جريمة ملوش علاقة أنه محامي أو قاضي أو مسؤول".

وأكمل: "لو عندك في ألمانيا عناصر مشاركة مع تنظيم داعش في المانيا هتتعامل معاهم ازاي؟ دانتوا أسقطوا عنهم الجنسية؛ ما تيجي أنت تحكم؟ وبيقول وكذلك الافراج عن السيد الباقر والمتهمين الأخرين؛ أنت بتدي نفسك سلطة انت عايز القضاء يحكم بالعدل والا عايزني اتدخل؟ عايز السلطة التنفيذية تتدخل في القضاء المصري؟ أنتوا كألمان عايز قضاء عادل مستقل والا تدخل في القضاء؟".

وأوضح: "هو أنا بعاقبه عشان محامي؟ هو متهم بدعم جماعة إرهابية اللي هو عندك بتسقط عنه الجنسية؛ أنت بتستبق الحكم ليه هو أنت عارف الحكم؟؛ لسه هتسمع الحكم بعد بكرة ترضى عنه أو لا ميفرقش".

وأختتم: "مناصرة جماعة إرهابية دا تعبير عن الرأي؟ وأنا بحيي الخارجية المصرية وكان لازم نرد مرة واتنين وأربعة مش دول هتدينا دروس".