أحمد موسى: التحكيم يجامل قطر.. ومنتخبنا لا أداء ولا فنيات
هنأ الإعلامي أحمد موسى؛ المنتخب الجزائري
بالفوز ببطولة كأس العرب؛ لافتا إلى أنهم حققوا البطولة بالفريق الاحتياطي بدون أي
محترف وأنهم يلعبون بروح قتالية عالية.
وقال موسى خلال برنامج "على
مسؤوليتي" المذاع على قناة "صدى البلد": "الجزائر من أول
البطولة بتقاتل للحصول على البطولة وبيلعبوا بروح وعايزين ناسهم نفرح دا منتخب
رايح يسعد جمهوره مش رايح يضايقنا منتخبنا النهاردة أنا نفسي كيروش يقوولي أمتي
يكون عندي منتخب يلعب بروح قتالية".
وأضاف: "مشفتش منتخب كامل؛ شريف مش عارف مكانه فين ومصطفى مش عارف مكانه فين شريف مرة
يلعب مرة يمين ومرة شمال وناقص يلعبه حارس مرمى؛ اللاعيبة مش عارفة بتلعب
ايه".
وتابع: "منتخب قطر لا يستحق أي شيء كان
في مجاملة من الحكام؛ كان لينا ضربة جزاء والتحكيم كان يجامل قطر فضيحة يعني؛
امبارح مدى ماتش قطر والجزائر 19 دقيقة وقت بدل من الضائع مشفنهاش من قبل؛ أدى 19
دقيقة عشان قطر تفوز".
وأكمل: "ضربة الجزاء الأخيرة كان
مفروض يرجع للفار؛ هو عايز قطر تفوز وخلاص؛ ولا عدالة في هذه البطولة والتحكيم صعب
ورئيس الاتحاد الدولي كان موجود؛ في فساد في التحكيم".
وأوضح: "كورتنا الأولى لما اتعادت في
ضربات الجزاء حصل نفس اللعبة ومتعادتش؛ نستحق على الأقل المركز التالت وضيعنا
انفرادات ومحمد شريف ضيع انفراد ومصطفى فتحي قطع من الناحية اليمين في أخر ثانية
ولو شاط كنا هنخلص".
وواصل: "أنا نفسي أعرف طارق حامد فين
سايبة يتفرج زينا؛ لية متخدش طارق حامد؛ انت محتاج خبرات في هذه الماتشات طارق وتد
مع احترامي لكل اللاعيبة".
واختتم: "أنت بتقول دي تجربة أنت مقولتش
أنك رايح للتمثيل المشرف؛ مصر يا جماعة في ايه عندي 100 مليون مش عارف نطلع منهم
22 واحد؛ حرقة أعصاب مبنشوفهاش في أي منتخبات تانية يا سيدي العب حلو واتغلب لا
أداء ولا فنيات ولا روح قتالية".
