تامر أمين يعلق على خسارة المنتخب أمام تونس: "فين ضياء السيد؟"

علق الإعلامي تامر أمين؛ على خسارة المنتخب الوطني أمام نظيره التونسي بهدف دون رد في المباراة التي أقيمت بين الفريقين ضمن منافسات بطولة كأس العرب.

وقال أمين خلال برنامج "أخر النهار" المذاع على قناة "النهار": "الحكم أدى 3 دقائق وقت ضايع والهدف جه في الدقيقة 95 وقانون الكرة بيقول الوقت يمتد بس لضرب الجزاء وهو كمل لحد الفاول بتاع تونس واحنا حطينا الجول في نفسنا".

وأضاف: "ماتش تونس دة أسهل ماتش وأسهل من ماتش الأردن اللي فات؛ منتخب تونس النهاردة في أقل حياته بدليل أنه مضيعش فرص عندنا؛ الشناوي تقريبا كان بيتفرج على الماتش؛ فرقة أه مسيطرة وماسكة كورة ولكن لو لعبوا 3 أيام مكانوش هيجيبوا جول".

وتابع: "في الناحية التانية أنت مفيش؛ كل اللاعيبة خارج الفورمة والـ 11 مكانش يومهم؛ أنا مش عايز أحمل اللاعيبة أكتر مما يجب عشان كلهم كانوا مش هما".

وأكمل: "أنا قلت إن عندي مشكلة وحيدة مع كيروش الهادرة بقوا مشكلتين؛ المشكلة الأولى اقتناعه وإيمانه الذي لا يتزعزع بمروان حمدي كرأس حربة في المنتخب النهاردة المشكلة مشكلتين؛ مروان حمدي والعند؛ المدرب اللي فيه سمة العند في منتهى الخطورة".

وأوضح: "هو شاف أن قفشة مكانش كويس الشوط الأول وراح مطلعه برة وصبر على حسين فيصل ومروان حمدي اللي ملعبوش كورة صح طول الماتش".

وواصل: "في مشكلة في الجهاز الفني وأنا بقول لاتحاد الكرة انهم لازم يقعدوا مع الجهاز؛ حد لمح النهاردة ضياء السيد شفتوه واقف أو بيكلم حد؛ شفتوه على الدكة؟ غير أنه واقف فقط خلال النشيد الوطني".

وأردف: "مين ضياء السيد دة؟ دا مش واحد من الجهاز دا المدرب العام للمنتخب يعني الرجل الثاني بعد كيروش؛ في مدير فني ومدرب عام ضياء السيد ومدرب محمد شوقي".

واختتم: "أنا شفت حاجة جديدة النهاردة؛ شفت أن كيروش بيقول لوائل جمعة تعليمات؛ كيروش سايب ضياء السيد ومحمد شوقي ورايح لوائل جمعة يقول تعليمات؛ يبدو أن في عدم اقتناع من كيروش وضياء السيد أو عدم تواصل أو خلاف".