عمر كمال يقترح حلا لأزمة المهرجانات.. وهاني شاكر يرد

اقترح المطرب الشعبي عمر كمال؛ حلا لأزمة مطربي المهرجانات بأن تقوم النقابة بإنشاء شعبة مخصصة لهم وضمهم إليها ضمانا منها لعدم صدور أي تجاوزات منهم.

وقال كمال في مداخلة هاتفية مع برنامج "على مسؤوليتي" المذاع على قناة "صدى البلد": "عندي رجاء صغير؛ عايز أنوه للأستاذ هاني شاكر المهرجانات دي عالم وهي بعيد عن عالم هاني شاكر وأي مطرب مهرجانات قاعد قدام المايك بيسجل أي كلام هو عايز يقولوه سواء كويس أو وحش".

وأضاف: "بينزل أربع خمسة مهرجانات كل يوم ولا في رقيب عليا؛ وزي مكان عندك سعة صدر للراب وانضموا ودخلنا الراب النقابة ممكن نعمل نفس الفكرة في المهرجانات؛ أنا لو تحت النقابة بشكل رسمي هخاف أقول أي كلام مش كويس".

وتابع: "إقصاء المهرجانات هتعود علينا بكارثة كبيرة لأن الناس هتدخل في عند؛ أنت متعرفش الفنان الفلاني ساكن فين أو هتعمله قضية فين وهيفضل ينزل في مهرجانات على اليوتيوب".

من جهته رد هاني شاكر على فكرة المطرب عمر كمال لافتا أن النقابة لا يوجد بها شعبة مهرجانات ولا أعتقد أنه يمكن عمل شعبة للمهرجانات.

وواصل: "النقابة لها أصول وأنت مطرب شعبي ومش مصنف مطرب مهرجانات؛ كونك تعمل أو متعملش مهرجان دي مش النقطة ولو حد من الأسماء الممنوعة وقفت قدام اللجنة نفسي أن تيجي تشوف ممكن ينجحوا والا لا".

واختتم: "احنا مش ضد المزيكا ولكن معظم الناس اللي بتؤدي المهرجانات بتعتمد على الإيقاع والكلام الغريب اللي بيقوله أو يقعد يهزر؛ بصراحة مينفعش في النقابة يبقي في شعبة مهرجانات عشان أجيب واحد لا بيعرف يغني ولا يلحن ولا يعزف وأقول إن كدة باحتويه".