أحمد موسى ينفعل على الهواء بسبب تصريحات حكم القمة: "مش دورك تطبطب وتدلع"

هاجم الإعلامي أحمد موسى؛ تصريحات محمد عادل حكم مباراة القمة بين الأهلي والزمالك والتي أشار فيها إلى أنه قام باحتواء لاعبي الزمالك بعد أن شعر بتوترهم.

وقال موسى خلال برنامج "على مسؤوليتي" المذاع على قناة "صدى البلد": "أنا حكم أنا مالي بتوتر اللاعيبة أنا عدالة وملوش علاقة؛ هو السيد القاضي عالمنصة بيقولك شوفت ده بيعيط؛ أنا حكم مليش علاقة بده متوتر وده فايق".

وأضاف: "قالك لقيت اللاعيبة متوترين وكان لازم أحتوي؛ هي مباراة احتواء؟ أنت مش طرف في الموضوع هو دورك أنك تطبطب في التحكيم؟ أنا مالي ملناش علاقة؛ تحتوي مين يا كابتن عادل هي مسؤوليتك الاحتواء؟".

وتابع: "مش دورك؛ أنت هنا بتخلينا نتشكك؛ قالهم يا جماعة خلوا بالكم أحنا في مرحلة الإدارة يعني منديش أنذارات وعشان كدة ندي ضربة جزاء؛ اتعاملنا في المباراة بمسألة أطبطب وأدلع مش دورك يا كابتن؛ أنت بترجع النهاردة التحكيم أن الناس تقول الفريق دة زعلان أطبطب عليه والفريق دة كسبان يبقي هاجي عليه".

وأكمل: "انت بتبص على التوتر ليه؛ أنت تبص على الكورة فاول ضربة جزاء يتحسب؛ الحكم ليس له علاقة أن دة متوتر أو فرحان؛ أنا أكلمت مع كابتن عصام عبد الفتاح وأشأدنا بيك ولكن في أخطاء وعرفنا دلوقت ليه مخدتش قرارات أخرى".

واختتم: "ليه بترجعنا لنقطة لا نتمناها؛ الحكم مش شغال جبر خواطر ودور الحكم الحياد المهنية والعدالة والإنصاف وليس لك أي دور أبدا مين يفوز أو لا؛ ليه وترت الناس هذا الرجل هو الحكم وهو اللي ماسك الصفارة ليه أكلمت كدة وليه قلت الكلام دة وهل ليا الحق كحكم بعد المباراة أتكلم؟".