عمرو أديب يهاجم الأهلي بسبب تهنئة أبوتريكة: "أي مؤسسة تعمل كده تتقفل"
هاجم الإعلامي عمرو أديب؛ النادي الأهلي على
خلفية تهنئة لاعب الفريق السابق محمد أبو تريكة بيوم مولده، لافتا إلى أن اللاعب السابق
قد صدر ضده حكم قضائي بإدراجه ضمن قوائم الإرهاب.
وقال أديب خلال برنامج "الحكاية"
المذاع على قناة "إم بي سي مصر": "في شغلي دايما في اليوم الأخير
اللي قبل الإجازة بحاول معملش مشاكل وفي واقع الأمر أن الحكاية الأولى اللي هتكلم
فيها هتعملي مشاكل بس دي الشغلانة أني ممكن أقول رأيي وأتعاقب عليه".
وأضاف: "في حاجات الواحد بيعديها وحاجات
الواحد ميعرفش يعديها؛ بقالنا يومين تلاته في احتفالات بعيد ميلاد الكابتن أبو
تريكة ولعيب كان عظيم وعبقري؛ عيد ميلاده وطبيعي الناس تهنيه وهو ينتمى لنادي
الأغلبية المصرية وأغلب مصر لازم تهنية ومعنديش أي مشكلة خالص".
وتابع: "إنما النادي الأهلي المملوك
للدولة مينفعش يهني أبو تريكة؛ ليه لأن أبو تريكة مدرج في قوائم الإرهاب؛ حاجة من اثنين
إما الأهلي لا يعترف بالقضاء ولا بأحكام القضاء يا النادي الأهلي قرر يتخطى كل دة؛
الأهلي فوق الجميع الأهلي فوق الإخوان واحنا هنهني أبو تريكة".
وواصل: "هل دا ينفع أو يجوز؟ انتوا
عارفين ايه الفرق بينا وبين الإخوان أن في حد بيقولك يا عمرو يا أخي متخلي الأهلي
يهني؛ هما الأخوان بيعملوها؟ يوم عيد ميلاد عمرو أديب هتلاقي الإخوان أو يوم عيد
ميلاد أي رمز من رموز 30 يونيو بيهنوا؟ أبدا الإخوان ميعملوهاش احنا بس اللي عندنا
طيبة تصل لدرجة السذاجة".
وأوضح: "11 مارس 2021 تأييد إدراج
أبو تريكة على قوائم الإرهاب؛ أنتوا حاجة من اثنين أما معترفين بالقضاء المصري أو
يطلع الأهلي ببيان يقول إن أبو تريكة غير مدرج على قوائم الإرهاب".
واختتم: "الأهلي كان عامل حفلة والخطيب
موجود وحطوا أبو تريكة وأم كلثوم من رموز الأهلي والكلام ده مبيحصلش في المجتمعات
الديمقراطية وأي مؤسسة تعمل كدة يتم إغلاقها تماما".
