تامر أمين يسخر من تعهد محمد رمضان أمام نقابة المهن الموسيقية

سخر الإعلامي تامر أمين؛ من تعهد الممثل محمد رمضان؛ أمام نقابة المهن الموسيقية بعدم خلع ملابسه على المسرح خلال الحفلات التي يقوم بالغناء فيها.

وقال أمين خلال برنامج "أخر النهار" المذاع على قناة "النهار": "بمناسبة محمد رمضان في خبر غريب أنا قريته أمبارح والخبر أن محمد رمضان راح نقابة المهن الموسيقية ومضى عندهم تعهد وهو أغرب تعهد سمعته في حياتي".

وأضاف: "من وأنا صغير وأنا عارف أن الناس بتمضي على تعهد بعدم التعرض لحد أو بأداء أمانة ولكن محمد رمضان راح نقابة المهن الموسيقية لأن واضح أنه عنده حفلات وعايز ياخد تصريح للغناء".

وتابع: "محمد رمضان مضى تعهد بعدم خلع ملابسه؛ وصلنا بينا الحال أن الفنانين يمضوا تعهد أنهم مش هيقلعوا؟ ومحمد مضى على كدة؟ هيطلع على المسرح بهدومه؟ لابس لبس فوق وتحت عادي كدة؟ ميبقاش رمضان اللي نعرفه في الحفلات بتاعته".

وأوضح: "محدش يقول دا شو؛ هو دا اللي بقولكم عليه؛ مش كل حاجة يعملوها برة تتعمل عندنا؛ مش بالضرورة دا يناسبنا أو نعمله عندنا؛ نغني غنانا ونعمل الشو اللي يناسبنا؛ لا احنا عايشين معاهم ولا هما عايشين معانا".

وأكمل: "كل واحد يشوف اللي يناسبه ويعمله؛ خلط الأشياء هو اللي بيؤدي لاختلاط المفاهيم عند الناس فالناس تعمل الجرايم اللي بنشوفها".

واختتم: "شيء غريب ولم أكن أتوقع في يوم من الأيام أني أقول إن الفنان محمد رمضان راح يمضي تعهد بعدم القلع؛ بس عشان مبقاش ظالم أوي في ناس كتير لازم تمضي على التعهد دة".