بسمة وهبة تعيد طرح السؤال: "مهرجان الجونة بتاع أفلام ولا فساتين؟"

علقت الإعلامية بسمة وهبة على التركيز الإعلامي والجماهيري على فساتين الفنانات في مهرجان الجونة السينمائي، مؤكدة أن الأمر أصبح يتكرر كل عام.

وقالت وهبة خلال برنامج "90 دقيقة" المذاع على قناة "المحور": "محدش عارف يجاوب على السؤال من وقت ما بدأ مهرجان الجونة السؤال هو مهرجان الجونة مهرجان فساتين ولا مهرجان أفلام وسينما".

وأضاف: "النهاردة للسنة الخامسة على التوالي والخناقة لسة دايرة، يبدأ المهرجان ويبدأ التعليقات على فساتين الفنانات وتتحول السوشيال ميديا إلى عناوين".

وتابعت: "تبدأ المقارنة بين فستان فلانة وعلانة ومين أحلي ومين أوحش وبتبدأ خناقات جماهيرية حوالين الفساتين لدرجة أنك تحس أن المهرجان كله فساتين وبس مفيش أفلام ولا ندوات".

وأكملت: "إحنا أمام مهرجان سينمائي قدر يثبت نفسه في فترة صغيرة وفيه تنوع كبير؛ مهرجان الجونة في دورته الخامسة بيشارك فيه 76 فيلم منها 7 أفلام مصرية".

وواصلت: "فين المشكلة بقى؟ لية صورة المهرجان بقت صورة فساتين وبس؟ لما تجاوب على السؤال هتلاقي نفسك بتدور في حلقة مفرغة، الفنانين والنجوم هيقولك احنا ملناش دعوة".

وأكملت: "الصحفيين والمواقع هيقولك أنا مليش دعوة أنا بعمل شغلي ولما نمشي على الريد كاربت بيقولك بيسألونا عن الفساتين ومش عن الأفلام".

واختتمت: "تسأل إدارة المهرجان يقولك احنا عاملين ندوات والناس مش بتهتم إلا بالفساتين وكل واحد يبعد التهمة عن نفسه ولكن الجميع مشاركين في الموضوع".