عمرو أديب عن ارتفاع أسعار البيض: "متخلوناش نلجأ للحلول الصعبة"
علق الإعلامي عمرو أديب؛ على الارتفاع
المبالغ فيه لأسعار البيض مع دخول موسم المدارس والذي جاوز الـ50 جنيه للكرتونة
الواحدة.
وقال أديب خلال برنامج "الحكاية"
المذاع على قناة "إم بي سي مصر": "في رمضان اللي بناكل فيه بيض
وبنعمل البسكويت والحلويات تبقي كرتونه البيض ب 26 نيجي ندخل المدارس الكرتونة
تعدي ال 50 جنية؟ مش هتكلم عن البيض البلدي لأنه دهب".
وأضاف: "ليه كرتونه البيض ب 52 جنيه
واحنا داخلين المدارس؛ في حاجة غلط ودا شيء كبير والتجار مشيلنا أصل احنا خسرنا في
رمضان؛ طب خسرتوا بتشيلونا يعني والا اية".
وتابع: "بدل ما يجي يوم نقول عايزين
نقاطع البيض عشان ينزل زي ما عملنا في الفراخ واللحمة؛ وبعدين يزعلوا من المواطنين
يقولك أصل المواطنين بيقاطعوا الحاجة وفجأة يطلع يقولك أنت عارف في كام مربي فراخ
في مصر؟ يقولك 90 مليون اللي هو مصر كلها لها علاقة بالفراخ عشان يخوفك ويقولك اقتصاد
البيض دة حاجة عظمة".
وأكمل: "متخليكو كويسين بما يرضي الله؟
52 للكرتونة دة كتير ومتوسط العائلات 5 بيضات؛ ويعني لو كل واحد بيضه دا كتير هي
الكرتونه هتقعد قد اية".
واختتم: "أرجو أن الموضوع يتبصله؛ وزارة
الزراعة تنظر للأمر ووزارة التموين تنظر للأمر وخصوصا أن بكرة في 30 مليون طالب
رايحين المدرسة كل واحد من نفسه بردو سندوتش بيض أرجوكم بدل ما نضطر للحلول الصعبة
ودي حاجات بتفرق في سلة التضخم كلها خصوصا أن السلة دي فيها خضار فاكهة بيض جينة
لبن؛ كل حاجة لما تزيد تبقي حدوتة صعبة جدا على الناس".
