بعد إصابة سائق قطار بطوبة.. عمرو أديب يوجه أغرب طلب للمواطنين
علق الإعلامي عمرو أديب على إصابة سائق أحد
القطارات بجرح في الصدر بعد إلقاء حجر عليه خلال قيادته لأحد القطارات.
وقال أديب خلال برنامج "الحكاية"
المذاع على قناة "أم بي سي مصر": "ايه الهدف من أنك تضرب سواق
القطر بالطوب وسبحان الله إيده صاروخ؛ دا قناص أنه يرمي الطوبة وتعدي من الشباك
وتروح راشقة في صدر الراجل فتحاه انت لو معاك بندقية بمنظار مش هتعمل كدة".
وأضاف: "اية العادة المهببة انك ترشق
القطار؛ العيال عندها طراش أن القطر وهو معدي نرميه بالطوب إيه الفكرة إيه اللعبة
إيه المتعة؟".
وتابع: "ايه فكرة أن أضرب القطر وأكسر
الأزاز وأخيرا الراجل الغلبان اللي نازل
يشتغل في ظروف صعبة؛ دي إيد مين؟ دا ولا الراجل اللي بيرمي سهم في
الأولمبياد".
وأوضح: "لو الراجل دة وقع أو أغمي عليه
لو الراجل دة حصلة أي حاجة وجات فيه عينه أو في دماغه وجاتلة حالة اغماء وهو سايق
القطر اية اللي ممكن يحصل؟".
وأكمل: "أنا بوجه أغرب طلب عمله إعلامي
للناس أرجوكم مترموش القطر بالطوب؛ أرجوكم متضربوش السواق بالطوب هنصفح القطر بعني
هنخليه ضد الرصاص والطوب؟".
واختتم: "أية الفكرة؟ أية الافتكاسة
اللي كانت في دماغك وأنت بتعمل كدة؟ أية المتعة؟ شيء غير وارد وبقاله سنين مش
فاهمينه".
