تامر أمين عن أداء موسيماني مع الأهلي محليا: "ناسي الكورة والتدريب"

علق الإعلامي تامر أمين؛ على خسارة الأهلي لبطولة السوبر المصري أمام طلائع الجيش بعد الهزيمة أمام طلائع الجيش بركلات الترجيح.

وقال أمين خلال برنامج "أخر النهار" المذاع على قناة "النهار": "السوبر مكانش سوبر وفي واحد بس كان سوبر اسمة عبد الحميد بسيوني كل الاحترام والتقدير راجل بإمكانيات محدودة وفرقة من غير خط هجوم ولسة متجمعين من أسبوع واستطاع عمل ملحمة دفاعية ممتازة وأفشل كل نقاط القوة في الأهلي والسيناريو اللي حطة هو اللي حصل".

وأضاف: "طلائع الجيش اعترضوا على أن يكون في وقت إضافي وكان عايز مباراة السوبر 90 دقيقة وبعدين ضربات الجزاء؛ كانوا بيتدربوا كدة من زمان".

وتابع: "مبروك البطولة الأولى لطلائع الجيش ووقعها بـ 100 بطولة لنادي متعود على البطولات ورغم أهلاويتي فأنه دا ميمعنش أني أقدم التهاني".

وواصل: "سبحان مغير الأحوال؛ أشوف أفريقيتك أصدقك أشوفك في الدوري أستعحب؛ بقيت أحس أن في اتنين موسيماني واحد عادي وواحد بشرطة".

وأوضح: "موسيماني اللي في أفريقيا بيدير المباريات بشكل يشهد له الجميع؛ بيدير المباريات بحرفية وتقنية يشهد لها الجميع؛ شوف إدارته لمبارتي الوداد والنجم وصن داونز وكايزر تشفيز الزمالك في النهائي اللي فات؛ عبقري وقالوا إن الراجل دة مخلوق عشان يدرب فرقة تاخد بطولة دوري أبطال أفريقيا".

وواصل: "بيركب الطيارة ويرجع للدوري المحلي تلاقي موسيماني بشرطة راجل ناسي الكرة وناسي التدريب عنده مشاكل في قراءة المباريات ومتردد في القرارات والتشكيل فيه مشاكل وتصليح المشاكل بمشاكل".

واختتم "الأداء باهت جدا؛ معنديش مشكلة أننا نخسر ولكن في مشكلة أن محاولش أكسب؛ الأهلي كان أكثر استحواذ على الكرة ولكن بلا خطورة وفي 120 دقيقة كان في فرصة أو اتنين؛ العقاب جاء من جنس العمل؛ أنت أستهنت وكنت بتتمشي في الماتش ورغم حزني الشديد ألا أني سعيد أن دة حصل؛ عشان هتكون صفعة قوية في بداية الموسم ولكن خد بالك الصفعة القوية مينفعش بعدها صفعة تانية لأنه ساعتها مش هتبقي صفعة تفوق؛ هتروح".