"خليته ينط سلك الكهربا".. اعترافات الطبيب المتهم في واقعة "السجود للكلب"

أظهرت تحقيقات النيابة في القضية رقم 13401 لسنة 2021 جنح النزهة، والمتهم فيها عمرو خيري، طبيب بشري، والمعروفة إعلاميا بـواقعة السجود للكلب، مفاجآت من العيار الثقيل.

وقال المتهم عمرو خيري خلال التحقيقات: "موضوع الكلب بدأ بهزار عادل معايا قبل يوم الفيديو بحوالي أسبوع، وكان تقريبا الهزار يوميا لحد اليوم اللي صورت فيه الفيديو، وهو قبل ما أصور الفيديو كان بيفضل يقولي بهزار أنت زعلان عليه ليه هو أبنك، أنا ممكن اجيب لك 15 زيه من القلج وبعد ما الكلب توفي، جبت كلب ثاني وقعد يقول على الكلب الثاني أن هو هرب مني من الساحل، وأنا كنت بضحك وأستقبل الهزار بصدر رحب وساعات كنت بقولة بكرة يموت لك عزيز". 

أضاف المتهم: "أنا كنت قاعد في المكتب في عيادة العظام في الدور الأرضي في المستشفى، وكان معايا الدكتور معتز مسعد جمال الدين والسكرتير عمرو محمد رفعت، وعادل دخل عليا مش فاكر أنا اللي بعت له ولا هو جه من نفسه، ومكنش في أي إتفاق بيني وبينهم كل اللي حصل أننا ابتدينا نهزر مع عادل".

وتابع المتهم عمرو خيري في التحقيقات: "أنا والدكتور معتز مسعد والسكرتير عمرو رفعت قعدنا نهزر معاه تقريبا أقل من 10 دقائق، بدأ الهزار بالكلام وبعدين طلبنا منه ينط 20 نطة بالحبل من غير ما يقف وأننا هنديله 50 جنية، وجبنا سلك كهرباء، وعمرو السكرتير مسك طرف ومعتز مسك الطرف الآخر وبدأ عادل ينط الحبل وبعد كده خليته يحي الكلب وأنا كمان أديت التحية للكلب بس الكلب مكنش موجود كان هزار، وبعدين قولتله اعتذر للكلب ولو ما أعتذرتلوش هخليك تسجد له قالي لا مش هينفع أسجد له قولت له خلاص أديله التحية".

مضى يقول: "أنا مكنتش أقصد أي حاجة، أنا بهزر بس وده تجاوز لفظي غير مقصود، أنا مسلم وحجيت بيت الله واعتمرت وقبل الواقعة كنت لسه مصلي جماعة، وعن أوصاف الأدوات المستخدمة قال خيري "سلك كهربائي لونه أبيض وكان حوالي 2 متر أو أكثر والعصايا الخشب كان لونها بني فاتح مسطرة خشب وطولها حوالي نصف متر تقريبا".

وواصل: "عادل استجاب لينا عشان كنا بنهزر معاه، فأنا قولت أصور عادي عشان الهزار".

كانت المحكمة الاقتصادية بالقاهرة، قررت تأجيل محاكمة طبيبين وموظف بتهمة التنمر على ممرض، والمعروفة إعلاميًا بـ"اسجد للكلب" لجلسة 25 سبتمبر للاطلاع.