طالب الثانوية صاحب واقعة «صفر العربي» يفجر مفاجأة بعد تدخل الوزير

كتب الطالب يوسف محسن، صاحب واقعة "صفر اللغة العربية" فى امتحانات الثانوية العامة لعام 2021 والذى أثار جدل كبير على السوشيال ميديا خلال الساعات الماضية منشور جديد قائلا: «حقي رجعلي بعد شهاده الملاحظين وشهاده اتنين من صحابي فى اللجنه اللي بجد بحب أشكرهم جدا (يوسف محمد جوده /يوسف ياسر )لأن أنا أصلا ماليش علاقه بيهم مسبقه لكن لما حسوا إني مظلوم مأتاخروش لحظه فى انهم ييجوا ويشهدوا بالحقيقه واللى شافوه».

وأضاف الطالب :«شكر خاص معالي الدكتور طارق شوقي وزير التربيه والتعليم لسرعه استجابته واهتمامه بالموضوع شخصيا لاظهار الحق وكان متعاون جدا جدا جدا معايا وقدم كل التسهيلات علشان أقدر أمشي الموضوع قانونيا لاظهار حقي دون اي مجاملات »

وبالتواصل مع الطالب محسن يوسف قال فى تصريحات خاصة لـ"الرئيس نيوز" أن الوزارة وعدته بحساب مادة اللغة العربية من متوسط درجاته، وتم طمأنته فى هذا الشأن، وأضاف أن وزارة التربية والتعليم عرضت عليه أن يدخل الدور الثاني بالدرجة كاملة ولكنه لا ينتظر حتى دخول الدور الثاني.

وكان وزير التربية والتعليم الدكتور طارق شوقي أعلن عن التحقيق فى واقعة طالب صفر اللغة العربية بعد إستغاثته التى نشرها على الفيس بوك

حيث استغاث الطالب يوسف محسن طالب في الصف الثالث الثانوي بعد ظهور نتيجة الثانوية العامة مباشرة ، بالدكتور طارق شوقي وزير التربية والتعليم والتعليم الفني، لحصوله على صفر في اللغة العربية بامتحانات الثانوية رغم حصوله على مجموع جيد في باقي المواد.

وقال الطالب في منشور عبر حسابه على "فيسبوك": "أنا اسمي يوسف محسن من مدرسة جمال عبدالناصر غرب الفيوم جبت 64% وجبت في العربي صفر وحصل معايا أن كنت مسلم ورقتين للبابل شيت وعامل محضر بده زي ما المدرس قالي أنا قولت للمراقبة أنا غلطت في سؤال أعمل ايه ادتني بابل شيت قالتلي حل فيه السؤال ده بس وهندبسه الاتنين في بعض ومعاهم المحضر".

وأضاف: "المحضر مكنش بتبديل بابل شيت لا أنا كنت كاتب إن عندي سؤالين غلط وتم نقلهم في بابل شيت آخر على حسب تعليمات المدرس بالكلام اللي هكتبه أنا معرفش إزاي أكتب محضر أنا كتبت اللي قاله.. ولما سألت دلوقتي كذا مدرس قالوا بيروح ورقة واحدة والتانية بتتبعت كتالف ومدرسين قالوا بتتقطع بس وده مش اللي مضيت عليه ولا كتبته في المحضر، والمحضر اتعمل ومضيت على أساس اللي المستر بتاع اللجنة قالي عليه واللي أنا كاتبه بايدي في المحضر".

وأضاف الطالب: "وكتبت المحضر إني نقلت إجابه السؤال ده ف بابل شيت تاني ومضيت عليه والمراقب كنت قولتله طيب ينفع يبقي ليا اتنين قالي طالما معمول محضر إثبات حاله خلاص وكان في آخر الوقت وقالي يلا عشان الوقت خلص وأنا كنت أول مرة في حياتي امتحن بابل شيت ولسه معرفش أي حاجه ف مشيت ورا كلام المدرس اللي هو أكيد فاهم أكتر مني ودلوقتي لقيت إني جايب صفر فمعنى كده إن الورقة اللي هي فيها سؤال واحد اللي راحت واتصححت ومع العلم المدرس قالي هيروح الاتنين طالما عملت محضر".

واختتم الطالب: "هل ذنبي إني مشيت ورا كلام المراقب اللي أصلا مخلانيش أنقل غير سؤالين بس ولو سابني أنا كنت هنقل كله بس المراقب والمراقبة كانوا واقفين جنبي عايزين يلموا الورقة وخلاص".