يوسف الحسيني ينتقد تصرفات رواد الساحل الشمالي: ليه تشتري مايوه ب3 الآف جنيه.. بتلاقوا الفلوس في الشارع؟
انتقد الإعلامي يوسف الحسيني، تصرفات رواد
الساحل الشمالي، بسبب حالات البذخ والإنفاق المبالغ فيه من أجل التباهي بالسيارات والملابس بشكل غير
طبيعي.
وقال الحسيني خلال برنامج
"التاسعة" المذاع على القناة "الأولى": "إيه اللي حاصل
في أدمغة ونفوس بعض المصريين مقدرش أقول إن الساحل الشمالي يعكس شكل لسلوك
المصريين ولكن مجموعة من العادات الغريبة اللي اتفق رواد الساحل على ممارستها".
وأضاف: "مقدرش أقول إن دي ظاهرة لدى
عموم المصريين، وأستخدم المصطلح الموجود على وسائل التواصل الاجتماعي؛ الساحل
الطيب والساحل الشرير؛ الساحل قبل الكيلو 90 وبعد الكيلو 90".
وأضاف: "قبل الكيلو 90 ناس عادية زي
حضرتك وحضرتي، ناس عايزة تتشمس تنزل البحر نلعب كورة نلعب راكيت ناكل أكلة كويسة ودة
اللي اتفقنا عليه وتوافقنا عليه الشكل العام المسيطر هو البساطة في كل شيء؛ استحالة
أبقي في الساحل ألبس جاكيت بيكون تشيرت لطيف وشورت لطيف".
وتابع: "بقالنا كام سنة في حاجة مش
مظبوطة؛ الناس بعد الكيلو 90 بتعتبر أنها في مجتمع تاني؛ مجتمع لا يفكر في أي شيء
لا يفكر إلا في ازاي تنمنظر على بعض".
وأكمل: "المباهاة بالعربيات وموتورات
العربيات واللبس؛ أنا مفهمش واحد بيروح يشتري مايوه بـ 3 ألاف جنيه؛ في ماركات
كتير لكن ياخد بعضه ويشتري ماركة إيطالي وفرنساوي والستات لابسين ألماظ وحاطين 9
كيلو ميك أب على وشوشهم".
وأكمل: "محلات الكوافير فاتحين في
الساحل وبتصحي الصبح الست تعمل شعرها وتروح على البحر مهو هيبوظ من الرطوبة
والماية؛ يلا بينا نصرف فلوس ونوري الناس ازاي نصرف الفلوس".
وواصل: "هو انتوا بتلاقوا الفلوس دي في
الشارع؟ طيب قولولنا أين الشارع اللي بتمطر سمائه فلوس عشان نقف فيه نص ساعة".
واختتم: "العلمين الجديدة لما تفتح
هتأدب الساحل لأنها ستسود أخلاق وعادات المدينة والمناطق التابعة للعلمين الجديدة
زي القري السياحية هتفضل مناطق لقضاء الاجازات، بتتمنظروا جوة ليه؟ بتتمنظروا على
بعض ليه؟".
