تامر حسني: "فيلم مش أنا كان مخاطرة والفكرة مبنية على حالة حقيقية"

كشف الفنان تامر حسني؛ كواليس إنتاج فيلم "مش أنا" لافتا أن العمل كان مخاطرة في ظل ظروف السينما الحالية وقصر الحضور على 50% من الجمهور في القاعات.

وقال حسني في مقابلة مع برنامج "الحكاية" المذاع على قناة "إم بي سي مصر": "في البداية أشكر كل صناع العمل والأبطال والفيلم كان مجازفة وكل السينمائيين كانوا خايفين لأن نسبة الإشغال 50% واللي كان بيعمل إيراد 50 بقي يعمل 25 دا لو كلهم راحو".

وأضاف: "جالي إحساس أني أنزل بالفيلم وفاجئني وعمل ايراد أعلى ما قبل الكورونا كمان السينما بتفتح حاليا والأفلام اللي نازلة هتكون حظها أحسن".

وتابع: "فكرة الفيلم جاتلي لما المخرجة سارة وفيق واللي كانت كانت مساعدة في عمر وسلمي قالتلي تامر في فكرة في سطر والسطر دة أنا عاملة عليه فيلم؛ قلتلها اللي انتي عاملاه ملوش علاقة بالسطر؛ بعد اذنك هاخد السطر وانا هعمل عليه قصة".

وواصل: "قلتلها هاتي السطر وانا هعمل عليه فيلم بعد اذنك وبدأت اكتب القصة وأنا كاتب كل أو معظم أفلامي زي عمر وسلمي ونور عيني والبدلة والفلوس ومش أنا وفي أساتذة كبار بيشتغلوا معايا ولكن فيلم مش أنا كتبت قصة وسيناريو وحوار من الألف إلى الياء".

وأكمل: "كتابة وتحضير الشخصية استغرق سنة لأن الشخصية تركيبة معقدة عايزة تناسق ذهني وعصبي وعضلي؛ كل فكرة التمثيل مبنية على أن نص في الجسم ملوش دعوة بالجزء التاني".

واختتم: "الناس بتتوقع أننا عاملين حاجة ارادية كدة ولكن الفكرة حقيقية وتمثيلها صعب ازاي ايدك دي تفاجئ كل جسمك أنها هتعمل حاجة تانية من غير وعي منك".