في أول رد له .. حسام حبيب يسخر من مروجي شائعات خلافاته مع شيرين ويتبرأ من تصريحات والده عن علاقتهما

نشر المطرب حسام حبيب فيديو له ردًا على ما دار بشأن علاقته بزوجته الفنانة شيرين عبدالوهاب خلال الفترة الأخيرة، وذلك عبر حسابه الشخصي على موقع الصور والفيديوهات إنستجرام.

وظهر حسام حبيب في بداية الفيديو وهو يحتضن زوجته شيرين ومعهما طفلتها، وقال ساخرا من الشائعات التي تم تداولها عبر بعض المواقع وصفات السوشيال ميديا خلال الساعات الماضية: "هالو..ايه رأيكم فيا وأنا بضحك على شيرين وواخد الكريدت كارد بتاعتها.. إيه رأيكم فيا.. وإيه رأيكم فينا.. حلوين صح.. بكرة هنعمل لكم فيديو من المحكمة"، وقبلت شيرين عبدالوهاب زوجها حسام حبيب الذي طلب منها وابنتها الخروج من الفيديو ليستكمل رده.

وقال حبيب: "أنا عمري ما عملت فيديو ولا اهتميت إني أرد على أي حاجة اتقالت في يوم عليا"، كما قدم الشكر لمن وقفوا بجواره في هذه الأزمة معتبرًا أنهم إخوته، مضيفًا: "أنا مبحبش أدافع وأقول أنا معملتش لأن أنا أكبر بكتير أخلاقًا".

وتابع: "اللي حصل للأسف إن أقرب الناس لينا هما اللي زاقين ناس على ناس برضه قريبين مننا عشان مش عايشين حوالينا، الناس دي كلها كان ليها مصالح إن شيرين تكون منتهكة ومش فاهمة حقوقها ولما جه بني آدم فهم شيرين حقوقها وبقت شيرين هي المسؤولة".

وكشف عن أن هناك شركة مسؤولة عن أعمال زوجته وقال "شيرين عندها شركة بتدير أعمالها وانا مليش دعوة بيها والناس كلها في السوق عارفين الكلام ده ناس بروفيشنال شغالين مع شيرين ومبياخدوش أوامر أو إرشادات من حد".

كما اشاد حسام حبيب بشيرين قائلا : "شيرين أقدم مني وأنجح مني، ولما بتقولوا كدة بتقللوا من شيرين عبدالوهاب وأنا اتجوزتها وهي شيرين عبدالوهاب أنجح واحدة في الوطن العربي وناجحة ومش محتاجة حد يقولها تعمل إيه ومتعملش ايه، ولو هي حد قالها تعمل إيه يبقى ضيعت تعب السنين هباء، وأعتقد إن شيرين أكبر من كده، أما بالنسبة لأقرب الناس لينا أنا عارف إن عشان شيرين بقت الحمد لله أدرى بأمورها وقادرة تسيطر عليها أكتر وده مموتهم لأنهم مش عارفين يعملوا حاجة أكتر من كدة لأن الحنفية اتقفلت بالبلدي يعني وهم هيفضلوا يعملوا الحاجات دي".

واستكمل حديثه قائلا : "الحمد لله أنا دايما بقول لشيرين، وشيرين بتقولي كدة، إن ربنا اختارنا لبعض ولما اتنين ربنا اختارهم لبعض لا يمكن يفرقهم إنسان مش سوي ومعتقدش إن فيه إنسان عنده علاقة كويسة بربنا يزق حد على حد واللي اتزق عليه من حقه يتكلم عني كدة".

ورد حسام حبيب على مت بدر من  والده في حقه وحق شيرين قائلا :"أنا مش همشي ورا حتة بينكر ولا مبينكرش وصوته ولا مش صوته، أنا ميخصنيش الكلام ده، أنا عندي مشكلة في الثقة في الناس اللي حواليا والشخص ده مش أول مرة يأذيني وأنا آسف إني بقول الشخص ده".

وأضاف : "أنا مش عايز حد يزعل مني على إني بقول الشخص ده لأني صعب جدا إني صعب أقول الاسم العادي بعد اللي قاله واللي بيعمله أيا كان حد جرجره أو حد سجل له، أنا عندي تسجيل إن صاحبة الموقع زقت عليه 6 شهور".

وأكد حبيب أن شيرين تعرف جيدا كافة حقوقها وقال : "شيرين راشدة وعارفة حقوقها وابعدوا عنها وسيبوها تعيش لحياتها وبيتها وفنها وجمهورها وكفاية وإحنا لحد دلوقتي بنقول حسبنا الله ونعم الوكيل وده مش معناه ضعف ولو الحاجات دي استمرت أنا قادر أرد عليها وأجيب حقي بالقانون ومش هيفرق معايا درجة قرابته، أساس القصة وأطراف القصة واللي زق البنت من أقرب الناس لينا ومش هيفرق عندي صلة القرابة إيه لكن هيفرق عندي إنه بيفتري وبيتكلم في الأعراض وجاب سيرة أمي".

وأثنى على والدته، معتبرًا أنها علمته كل الأخلاق الكريمة وأن شيئًا جيدًا فيه تعلمه منها، وقال في نهاية حديقة : "أمي والراجل اللي خلفني منفصلين من 30 سنة وهي اللي ربتني وعلمتني وكانت دايما تقولي اسأل عليه ووده مهما أذاك، ومهما عمل، وأنا كنت بعمل كدة لحد آخر لحظة، أنا سألت دينًا وشرعًا لما الأذي يوصل كدة.. لا كدة كفاية".