بسبب "عباية وحجاب".. القصة الكاملة لطرد فتيات من كافيه بالتجمع الخامس

تعرضت مجموعة فتيات للطرد من كافيه في التجمع الخامس بسبب فتاة محجبة ترتدي عباءة كانت من ضمن المجموعة، ما أثار موجة غضب على مواقع التواصل الاجتماعي، ومطالبات لأصحاب الكافيه بتقديم اعتذار صريح للفتاة.

وقالت دينا حشيش، إحدى الفتيات المتواجدات ضمن الواقعة، عبر حسابها على "فيس بوك": "أنا وفريق الشغل قررنا نعمل اجتماع مهم في التجمع في كافيه الصبح، حد اقترح كافيه شيشة بسيط بس محدث في شارع التسعين».

أضافت: "بدأنا الاجتماع وكنا 5 بنات كل واحدة فينا شكل: البلوند، أنا، محجبات بأشكال مختلفة، مجموعة متنوعة، إحنا فريق محتوى بنكتب لـ١.٧ مليون فولوور وأحلى حاجة فينا اختلافنا لأن بنوصل لكل متابعينا مهما كانت خلفيتهم".

تابعت: "بعد ساعتين جت آخر بنت بدموع في عنيها من الإحراج وبتقولنا مش هقدر أحضر الاجتماع مش عايزيني هنا علشان لابسه عباية، ودي مش أي واحدة في فريق الكونتنت، أنا بقولها أنا هتبناكي من كتر حبي وإعجابي بيها".

وأكملت حشيش: «رحت للمدير قولتله عيب عليك إحنا في ٢٠٢١ وقدمت قوي حوارات الخوف من الاختلاف وبرضو مش هناقشك إن لك دريس كود، حقك ولكن أنا مديريتهم وجايباهم ومتكسفنيش قدامهم إحنا ساعة وماشيين". 

أضافت: "قالي في كاميرات والمدير هيلومني ومش مسموح بعباية ولا نقاب ولا شبشب أنا عمري في حياتي ما اتطردت من مكان ويوم ما يحصل يبقى في قهوة وأنا أصلا ما بشيش وجريوا ورانا في الشارع علشان ندفع تمن الأكل اللي ملحقناش ناكله وكامل زي ما هو وقولناله خلي مديرك يدفعه بعد المهانة دي. تطردني وأنا باكل وتقولي ادفعي".

من جانبها ردت حشيش على رسالة الكافيه، وقالت في تعليقها: "ببساطة إحنا مش عايزين نعملكم مشاكل أكتر من كدة خصوصا اللي بيرد من الصفحة بتاعتكم ما قرأش البوست، وأنا مش مبسوطة وآلاف الناس بتضغط عليكم، الموضوع بسيط".

وختمت: "اعتذروا للبنت اللي في فريقي لأنكم حسستوها إنها مختلفة عن زمايلها ولا تستحق إنها تكون وسطنا أو زينا وأنا مش كمديريتها بس كست زيها مش هسمح لشلة رجالة يهينوها بالشكل ده، ياريت تفكروا بشكل إنساني في الضرر النفسي اللي اتسببتم فيه وأنا أوعدكم إني أكتب كلمة طيبة في حقكم".